Sababta rasmiga ah ee ka dambeysay murankii la sheegay inuu dhex maray Mohamed Salah iyo Trent Alexander-Arnold intii lagu jiray tababarka Liverpool ayaa la shaaciyay.
Labadan xiddig, oo ka mid ah kuwa ugu muhiimsan kooxda, ayaa la sheegay inay isku dhaceen Isniintii intii lagu jiray tababarka Liverpool ka hor kulankii lugta labaad ee wareegga 16-aad ee Champions League ee ay la yeesheen Paris Saint-Germain.
Salah iyo Alexander-Arnold ayaa la arkay iyagoo si kulul isugu dhegan, taasoo keentay in Harvey Elliott iyo Ibrahima Konaté ay soo dhex galaan si ay xaaladda u xakameeyaan. Muuqaal laga helay Hayters TV ayaa si weyn ugu faafay baraha bulshada, taasoo dhalisay warar badan oo la isla dhexmarayay suuqa.
Alexander-Arnold ayaa u muuqday mid aad u xanaaqsan, isagoo sacbinaya gacmihiisa isla markaana tilmaamaya Salah. Xiddiga reer Masar ayaa jawaab ka bixiyay arrintaas, isagoo Alexander-Arnold riixay ka hor inta uusan xiddiga Ingiriiska dib ugu soo dhaqaaqin dhankiisa.
Markaas ayaa Konaté soo dhex galay, isagoo gacantiisa saaray Alexander-Arnold si uu xaaladda u dejiyo, halka Elliott uu sidoo kale Salah isku dayay inuu xakameeyo.
Xaaladdan ayaa walaac ku abuurtay taageerayaasha Liverpool, kuwaasoo ka baqay in xiriirka labadan ciyaaryahan uu xumaaday.
Si kastaba ha ahaatee, warbaahinta Liverpool Echo ayaa shaaca ka qaaday inaysan jirin wax khilaaf dhab ah, balse waxa dhacay uu ahaa kaftan iyo maaweelo, iyagoo arrintaas ka helay ilo xog-ogaal u ah Liverpool.
Warku wuxuu intaas ku daray in Salah iyo Alexander-Arnold ay si caadi ah u sheekeysanayeen kadib tababarka, islamarkaana murankii la arkay uu ahaa mid la iska illooway oo aan wax dhibaato ah ka dhalan.
