Boqorka Goolasha Xulka Portugal, Cristiano Ronaldo, Ayaa Helay Abaal-Marinta Guinness World Record Ee Ciyaaryahanka Ugu Guulaha Badan Kubadda Cagta.
Ronaldo ayaa abaal-marintan la guddoonsiiyay fiidnimadii Axadda, kaddib markii uu guulo la gaaray xulkiisa 132 kulan.
Kabtanka Al Nassr iyo Portugal ayaa la siiyay abaalmarintan kahor kulankii lugta labaad ee siddeed dhammaadka UEFA Nations League oo ay la ciyaareen Denmark.
Ronaldo ayaa hal gool dhaliyay markii xulkiisu 5-3 kaga badiyay Denmark waqtiga dheeriga ah, taasoo keentay inay usoo baxaan Semi Finals-ka UEFA Nations League.
Xiddiga reer Portugal wuxuu kubadda cagta heer caalami ku soo jiray in ka badan 20 sano, isagoo kulankiisii ugu horreeyay saftay bishii Agoosto 2003.
Marka laga soo tago guushiisii ugu dambeysay, Ronaldo waa laacibka ugu goolasha badan taariikhda kubadda cagta heer caalami ee ragga, isagoo dhaliyay 135 gool 217 kulan oo uu u saftay Portugal.
Sidoo kale, Ronaldo wuxuu dhaliyay in ka badan 900 gool oo xirfadiisa ciyaareed ah, isagoo u saftay Portugal iyo kooxaha Real Madrid, Manchester United, Juventus, iyo Al Nassr.
Wuxuu weli yahay gooldhaliyaha ugu sarreeya taariikhda Real Madrid isagoo u dhaliyay 450 gool.