Weeraryahanka xulka qaranka Belgium, Romelu Lukaku, ayaa shaaca ka qaaday inuu ka fiirsaday inuu ka fariisto ciyaaraha caalamiga ah kaddib guuldarradii ka soo gaartay France intii lagu jiray Euro 2024. Lukaku, oo 31 jir ah, ayaa sheegay inuu dareemay in xiriirkii uu la lahaa xulka uu sii xumaaday kaddib tartankaas.
“Si daacadnimo ah, kaddib guuldarradii naga soo gaartay France, aad ayaan u niyad jabay. Waxaan u sheegay Jan Vertonghen inaanan mar dambe dareemi doonin xiriir la’aanta xulka qaranka,” ayuu yiri Lukaku. “Waxaa jiray waxyaabo badan oo aanan aqbali karin intii lagu jiray Euros-ka, oo ay ku jirto jawiga kooxda.”
Si kastaba ha ahaatee, Lukaku ayaa dib uga fiirsaday go’aankiisa kaddib markii uu la kulmay agaasimaha farsamada cusub ee xiriirka kubadda cagta Belgium, Vincent Mannaert, iyo tababaraha cusub, Rudi Garcia. Kulamadaas ayaa soo celiyay rabitaankiisii uu u qabay inuu xulka sii matalo. Lukaku ayaa sidoo kale loo magacaabay kabtan-wadaag isaga iyo Kevin De Bruyne, waxaana la filayaa inuu xulka hogaamiyo kulanka ay la leeyihiin Ukraine ee Nations League.
Waxa uu sheegay in De bruyne iyo Courtois ay door muhiim ah ka ciyaareen in uu go’aankiisa ka laabto.
“Wadahadal wanaagsan ayaan la yeeshay tababaraha, kaddib waxaan hubay inaan doonayo inaan Belgium dib ugu soo celiyo heerka ugu sarreeya,” ayuu yiri Lukaku. “Waxaan rabnaa inaan mar kale muujino maskaxda guusha ee garoonka. Waa inaan taageerayaasheenna tusnaa inaan ku faaneyno xirashada funaanadda.”
Lukaku, oo leh 85 gool 120 kulan ayaa u saftay xulka tan iyo markii uu ku soo biiray 2010, hadda wuxuu diiradda saarayaa inuu xulka ku hogaamiyo guulo cusub oo caalami ah.
