Rio Ferdinand ayaa ka filanaya inuu falcelin ka arko Manchester United marka ay caawa martigeliyaan Liverpool kulanka weyn ee Premier League.
Rajada Man United ee kaalinta afaraad ee horyaalka Premier League ayaa mugdi gashay ka dib markii Man United ay waqtiga dhimashada ku hor kuftay Brentford iyo Chelsea.
Qaabkii ay guuldarada uga soo gaartay Chelsea ayaa noqotay mid dhalisay hadal heyn badan iyadoo mustaqbalka Ten Hag uu yahay mid uu shaki ku jiro.
Guuldarro culus oo ka soo gaarta Liverpool caawa waxay cimri degdeg ku keeni kartaa shaqada Ten Hag, laakiin Ferdinand ayaa rajeynaya inay ciyaartoyda u istaagaan inay u dagaalamaan calaamada kooxda.
Wuxuu u sheegay TNT Sport: “Kulanka Manchester United vs Liverpool waa kulanka ugu weyn. Rajo kaliya ayaan qabaa, wadnaheyga wuxuu leeyahay waan idiin baryayaa.
“Rajo ayaan qabaa. Wax walba waan sameynayaa. Man United waxay ku jirtaa boos aysan qaadan karin natiijo kale oo xun.
“Waxa aan rajeynayo inaan arko ayaa ah falcelin weyn daqiiqada ugu horeysaba, waxaana doonayaa inay dardar ku soo galaan garoonka, inay Liverpool fahamsiiyaan inaan guul u socono. Inaan u sheegno iyaga inay tani tahay ciyaar adag.”
