Chelsea iyo Real Madrid ayaa isku diyaarinaya dagaal suuqa kala iibsiga xagaaga si ay u helaan saxiixa daafaca dhexe ee Bournemouth, Dean Huijsen.
Xiddigan da’da yar ayaa xilli ciyaareedkan si weyn uga soo muuqday kooxda Bournemouth, isagoo bandhig cajiib ah ka sameeyay Premier League. Huijsen wuxuu kulankiisii ugu horreeyay ee xulka Spain ciyaaray Khamiistii, intii lagu jiray kulankii ay 2-2 la galeen Netherlands, taasoo ka dhalatay qaab ciyaareedkiisa fiican ee kooxda Cherries. Wararka ayaa sheegaya in Real Madrid ay muddo dheer la socotay daafacan, isla markaana ay qorsheyneyso inay xagaagan dalab rasmi ah ka gudbiso. Waxa kale oo la aaminsan yahay in Huijsen uu yahay taageere weyn oo Los Blancos ah.
Si kastaba ha ahaatee, wargeyska MARCA ayaa sheegaya in Chelsea ay sidoo kale si weyn u xiiseyneyso xiddigan da’da yar. Kooxda Blues ayaa labadii sano ee la soo dhaafay maalgelin weyn ku sameysay xiddigo mustaqbal leh, waxaana 19-jirkan loo arkaa inuu ka mid noqon karo mashruucaas. Si kastaba ha ahaatee, isla wargeyska MARCA ayaa sheegaya in Huijsen uu xagaagan kaliya u arko Bernabeu inuu yahay meesha uu ku biirayo, taasoo fursad fiican siinaysa Real Madrid.
Inkasta oo Huijsen uu doortay inuu u ciyaaro xulka qaranka Spain, haddana wuxuu asal ahaan ka soo jeedaa Netherlands, maadaama waalidkiis ay kasoo jeedaan Amsterdam. Wuxuu si rasmi ah u noqday muwaadin Spanish ah sannadkii 2024, wuxuuna kulankiisii ugu horreeyay ee caalami ah ka hortagay waddankiisii dhalashada.
