Paul Pogba ayaa sheegay inuu yahay ciyaaryahan daacad ah oo aan marnaba khiyaano sameynin, kadib markii la dhimay ganaaxii lagu soo rogay ee ku saabsanaa isticmaalka walxaha mamnuuca ee maanka dooriya.
Pogba ayaa markii hore la ganaaxay afar sano bishii Maarso, kadib markii lagu helay natiijo togan oo muujisay inuu isticmaalo dehydroepiandrosterone (DHEA), taas oo keentay in si ku-meelgaar ah looga hakiyo ciyaaraha tan iyo Sebtembar sanadkii hore.
Kadib racfaan dheer iyo baaritaan ay sameysay Maxkamadda Ciyaaraha ee CAS, waxaa la dhimay ganaaxa Pogba oo laga dhigay 18 bilood, taasoo ka dhigan inuu dib ugu soo laaban karo ciyaaraha bisha Maarso ee soo socota. CAS waxay go’aamisay in qaadashada Pogba ee walaxda mamnuuca ah aysan ahayn mid ula kac ah, balse ay ka dhalatay qalad uu sameeyay kadib markii uu si khaldan u qaatay daawo uu u qoray dhakhtar ku sugan Florida.
Wareysi uu siiyay Sky Sports News, Pogba oo ku guuleystay Koobka Adduunka 2018, ayaa ku celceliyay inuu yahay ciyaaryahan nadiif ah oo aan waligiis wax khiyaano ah sameyn. Wuxuu yiri: “Dadka i garanaya way ogyihiin inaanan marnaba u isticmaali laheyn wax mamnuuc ah si ula kac ah. Haddii ay dhacday, ma aheyn wax aan ula kac u sameeyay. Waxaan ahay qof jecel isboortiga, waxaan jeclahay ciyaarta, waxaana mar walba rabaa inaan guul u gaaro si cadaalad ah.”
Pogba ayaa sidoo kale sheegay inuu yahay qof neceb inuu guuldarreysto, laakiin marnaba ma qaato dariiqooyin khiyaano ah si uu u guuleysto. Waxa uu ku adkeystay inuu ku soo laaban doono garoomada isaga oo diyaar u ah inuu mar kale ku biiro xulka qaranka Faransiiska, isla markaana uu taageereyaasha tuso inuu wali yahay ciyaaryahan heer sare ah oo daacad u ah xirfadiisa.
