Tababaraha Chelsea Mauricio Pochettino ayaa jawaab adag ka bixiyay markii la weydiiyay sababta uu keyd u geliyay Thiago Silva kulankii xalay ee FA Cup ee ay ka badiyeen Aston Villa.
Keydka la geliyay Silva ayaa yimid maalmo ka dib markii xaaska daafaca reer Brazil ay baraha bulshada ku qortyay in la ceyriyo tababare Pochettino.
Wax yar ka dib markii ay soo dhamaatay ciyaartii ay Chelsea guuldarada 4-2 kala kulmeen Wolves Axadii, xaaska Thiago Silva oo lagu magacaabo Bella ayaa baraha bulshada ku soo qortyay in la joogo waqtigii tababaraha la bedeli lahaa.
Bella Silva ayaase raaligelin ka bixisay qoraalkaas ka hor kulankii xalay balse taasi kama aysan celinin in tababare Pochettino uu kursiga keydka dhigo daafaca waayo araga ah.
Pochettino ayaa go’aansaday inuu ku soo bilaabo wadnaha daafaca Benoit Badiashile iyo Axel Disasi halka 39 jirka Silva keydka la dhigay.
Markii la weydiiyay sababtii uu Silva keyd u geliyay, Pochettino oo ayaa jawaab adag ka bixiyay isagoo iska fogeeyay inay xiriir la leedahay hadalkii ay xaaskiisa ku qortay Twitter.
Wuxuu yiri: “Waa maxay sababta aad su’aashaan ii weydiineysaan? Waxaan ahay xirfadle. Mar walba waxaan ciyaartoydeyda ku soo xushaa qaab ciyaareedkooda iyo inaan isku dheelitiro ciyaarta.
“Waan fahamsanahay su’aashaan meesha ay u socoto, laakiin waxaan doonayaa inaan si degan oo xirfadlenimo ah uga jawaabo. Mar walba waxaan ahay xirfadle. Go’aan xirfadeysan ayuu ahaa ee wax kale shaqo kuma laheyn.”
