Mo Salah ayaa si kooban uga jawaabay su’aal laga weydiiyay xaaladda heshiiskiisa Liverpool kaddib markii uu labo gool dhaliyay guushii ay 6-3 uga adkaadeen Tottenham.
Reds-ka ayaa afar dhibcood oo nadiif ah ku qabatay hoggaanka Premier League Axaddii, halkaasoo Salah uu labo gool dhaliyay isla markaana laba caawin sameeyay, isagoo rikoor cusub ka dhigay horyaalka.
Kaddib bandhiggiisa cajiibka ah, Salah wuxuu noqday ciyaaryahankii ugu horreeyay ee taariikhda Premier League ee gaara 10+ gool iyo 10+ caawin kahor Kirismaska.
Waxa uu sidoo kale haatan kaalinta afaraad kaga jiraa gooldhaliyeyaasha ugu sarreeya taariikhda Liverpool, isagoo dhaafay halyeyga Billy Liddell ka dib markii uu gaaray 229 gool. Si kastaba, waxa uu wali 117 gool u jiraa rikoodhka gooldhalinta ee Ian Rush, kaasoo dhaliyay 346 gool 660 kulan. Salah ayaa qiray inuu la yaabay rikoodhkaas.
Weriyaha Patrick Davison ayaa weydiiyay Salah haddii wax war ah laga hayo xaaladda heshiiskiisa.
Laakiin Salah, oo xilli hore xilli ciyaareedkan u kululaa ka hadalka arrintaas, wuxuu si kooban ugu jawaabay: “Maya, waxba.” Waxaana halkaas ku soo dhammaaday wareysiga.
