Mohamed Salah oo rikoor cusub ka dhigay Premier League, kana sarre maray Wayne Rooney.
Xiddiga Liverpool, Mohamed Salah, ayaa sii wada jebinta rikoorro waaweyn oo horyaalka Premier League ah kaddib bandhig cajiib ah oo uu ka sameeyay kulankii barbaraha 3-3 ee ay kooxdiisu la gashay Newcastle United.
Salah ayaa ciyaartaas dhaliyay labo gool, halka uu sidoo kale gool kale ka caawiyay saaxiibadiisa, taas oo ka dhigtay mid taariikhi ah oo kale. Xiddiga reer Masar ayaa hadda noqday ciyaaryahanka ugu badan ee taariikhda Premier League hal kulan gool dhaliyay isla markaana caawin sameeyay, isagoo sidaas sameeyay 37 kulan oo kala duwan.
Arrintan ayaa ka dhigtay Salah mid ka sarreeya Wayne Rooney, oo hore ugu sameeyay 36 kulan inta uu ku jiray xirfaddiisa.
Bandhigga Salah ayaa sii adkeeyay kaalintiisa mid ka mid ah ciyaartoyda ugu waaweyn taariikhda horyaalka Ingiriiska, iyadoo uu weli ku jiro qaab ciyaareed heer sare ah xilli ciyaareedkan.
