Tababaraha kooxda Arsenal, Mikel Arteta, ayaa bixiyay war cusub oo laga walaacsan yahay oo ku saabsan xaaladda dhaawacyada Gabriel Magalhaes iyo Jurrien Timber, xilli Gunners ay isku diyaarinayso kulanka adag ee Real Madrid toddobaadka dambe.
Labada daafac ee Arsenal ayaa garoonka laga saaray intii lagu jiray guushii 2-1 ee ay ka gaareen Fulham, iyadoo Bukayo Saka uu dhaliyay gool kulankiisii ugu horreeyay tan iyo markii uu ka soo laabtay dhaawaca.
Gabriel ayaa dareemay xanuun dhanka muruqa ah (hamstring) kaliya 15 daqiiqo markii ay ciyaartu socotay, wuxuuna garoonka ka baxay kadib markii uu daaweyn helay. Waxaa beddelay Jakub Kiwior.
Dhinaca kale, Jurrien Timber ayaa sidoo kale dhibaato la kulmay kaddib markii uu isku dayay inuu joojiyo kubbad uu laaday Raul Jimenez. Inkastoo uu sii wadanayay ciyaarta, haddana waxa uu mar kale dareemay xanuun, waxaana lagu beddelay Leandro Trossard.
Timber ayaa horey uga haray waajibaadka xulka qaranka Netherlands sababo la xiriira jirro, balse waxa loo oggolaaday inuu dib ugu laabto ciyaaraha Arsenal toddobaadkan.
Arsenal ayaa safar ku aadi doonta Santiago Bernabeu si ay u wajahdo Real Madrid lugta hore ee wareega 8-da Champions League, waxaana shaki weyn uu hareeyay laacibiintan difaaca muhiimka u ah kooxda.
Mar uu ka hadlayay shirkiisa jaraa’id ee ciyaarta ka dib, Arteta wuxuu yiri:
“Gabriel iyo Jurrien, ma garanayno sida ay noqon doonaan. Waan baareynaa”
“Gabi wuxuu dareemay xanuun dhanka muruqa ah, mana garanayno sida uu dhaawacaasi u weynyahay.”
“Jurrien horey ayuu u dhibaatoonayay. Ugu dambeyn wuu sii wadi kari waayay ciyaarta.”
