Tababaraha kooxda kubadda cagta Arsenal ee Mikel Arteta ayaa ka hadlay wararka sheegaya inuu dhamaadka xilli-ciyaareedkan ka tegayo kooxdiisa Arsenal oo uu ka degi doono Barcelona oo si weyn loola xidhiidhinayo.
Xavi Hernandez oo Sabtidii ku dhawaaqay inuu ka tegayo Barcelona ayaa waxa la sheegay in kooxda reer Spain ay doorbidayso in Mikel Arteta oo kasoo baxay kulliyaddeeda da’yartu uu noqdo beddelkiisa, iyagoo la dhacsan qaabka uu u laylinayo Arsenal.
Mikel Arteta oo qandaraaska uu kula jiro Arsenal ay dhamaadkiisa ka hadhsan yihiin 18 bilood, ayaa saxaafaddu weydiisay haddii uu ka tegi doono Arsenal oo uu ku laabanayo kooxdii carruurnimadiisii uu u ciyaari jiray ee Barcelona, waxaana uu si aan gabbasho lahayn u sheegay in aanu meelna uga soconin Arsenal oo uu sii joogayo.
Arsenal ayaa dhinaceeda waxa qoraal kooban oo ay soo saartay ku sheegtay, in ‘Mikel Arteta ay ka go’an tahay inuu joogo Arsenal’ oo uu sii ahaado tababarahooda.
Si kastaba ha ahaatee, Mikel Arteta oo goordhow shir jaraa’id qaban doona ayaa faahfaahin dheeraad ah bixin doona, waxaana la sugi doonaa waxa uu yidhaahdo iyadoo ay daawanayaan taageereyaasha Arsenal iyo Barcelona.
