Mohamed Salah & Liverpool Oo Weli Isku Khilaafsan Heshiis Cusub, Michael Owen Oo Ku Baaqay In Kooxdu Wax Ka Beddesho Sharciyadeeda Ka Hor Inta Aan Goordambe La Gaarin.
Mohamed Salah iyo kooxda Liverpool ayaa weli aad uga fog is-afgarad ku saabsan kordhinta heshiiskiisa, iyadoo halyeeygii hore ee Reds Michael Owen uu ku baaqay in kooxda ay “sharciyadeeda wax ka beddesho” si aysan xiddiga u lumin.
Weeraryahanka reer Masar ayaa haatan galay bilihiisii ugu dambeeyay ee qandaraaskiisa Anfield, kaasoo dhacaya Juun 30, taasoo mugdi gelisay mustaqbalkiisa kooxda. Wararka ayaa sheegaya in wada-hadallada labada dhinac ay wali caqabad kala kulmayaan heshiis cusub, iyadoo laga war helayo in xaalada ay weli adag tahay.
Salah Oo Mar Kale Xilli Ciyaareed Wanaagsan Sameeyay
Xilli ciyaareedkan, Salah wuxuu mar kale soo bandhigay qaab ciyaareed cajiib ah, isagoo dhaliyay 32 gool 43 kulan oo uu saftay. Si kastaba ha ahaatee, hadallo dhawaan uu jeediyay oo la xiriira mustaqbalkiisa ayaa sii xoojiyay wararka sheegaya in tani ay noqon karto xilli ciyaareedkiisii ugu dambeeyay ee Liverpool.
Michael Owen Oo Liverpool Ugu Baaqay Inay Isbedel Samayso
Xilli uu la hadlayay talkSPORT, Michael Owen wuxuu sheegay in Salah uu doonayo inuu sii joogo Liverpool, balse ay lagama maarmaan tahay in kooxda ay wax ka beddesho shuruucda qandaraasyada ciyaartoyda da’da ah.
Owen wuxuu yiri:
“Mo Salah waa kiis gaar ah. Waxaan u maleynayaa in Salah uu doonayo inuu sii joogo, dhab ahaantii, waxaan hubaa inuu doonayo. Liverpool waa inay waxoogaa dabacsanaan ah muujisaa. Waxay yiraahdaan, ‘Oh, kaliya labo sano ayaan siinnaa ciyaartoyda da’dan gaadhay.’”
“Laakiin Salah maaha ciyaaryahan caadi ah, waa mid si aad ah u caafimaad qaba, wuxuu waqti badan ku qaataa jimicsiga, waa qof aad u xirfad leh. Ma aaminsani in saddex ama afar sano kadib uusan wali ku jiri doonin heerkiisa sare. Waa ciyaaryahan layaab leh, sidaas darteed waxaan siin lahaa heshiis waqti dheer ah.”
Liverpool Oo Khasaaro Weyn Ku Qabi Karta Bixitaanka Salah
Owen wuxuu sidoo kale xusay in Liverpool ay dhaqaale ahaan wax badan lumin doonto haddii ay go’aansato in Salah uu si xor ah uga tago, maadaama bedelkiisa lagu heli karo kaliya lacag aad u badan.
“Haddii aad rabto inaad bedesho Salah, waxay kugu kici doontaa lacag badan. Hadda lacag qandaraas kama bixinaysid, sidaas darteed waa inaad sameysaa wax kasta oo aad awoodo si aad u haysato. Waxaan u maleynayaa in Salah uu doonayo inuu sii joogo, balse sida la ii sheegay, weli waxaa jirta farqi weyn oo u dhexeeya labada dhinac.”
Liverpool ayaa wajahaysa go’aan adag oo ku saabsan mustaqbalka xiddigooda ugu muhiimsan, waxaana la sugayaa sida ay Reds ugu qancin doonto Salah inuu sii joogo Anfield.
