Kylian Mbappé, xiddiga reer France ee kooxda Real Madrid, ayaa muujiyay sida uu ugu faraxsan yahay ku biirista kooxda, isagoo sheegay in riyadiisii ay rumowday. Intii lagu guda jiray bandhiggiisa rasmiga ah ee Santiago Bernabéu, Mbappé wuxuu yiri: “Sanado badan ayaan ku riyoonayay inaan u ciyaaro Real Madrid, maanta riyadaydii waa ay rumowday.”
Mbappé wuxuu sidoo kale muujiyay sida uu ugu hanweyn yahay inuu guulo la gaaro Real Madrid, isagoo xusay in kooxda aysan lahayn xad: “Waxaan joognaa Real Madrid, xad malahan. Haddii aan dhalin karo 50 gool, waan dhalinayaa, laakiin waxa ugu muhiimsan waa guulaha iyo horumarka kooxda.”
Mbappe waxa kale uu caddeeyay in Real kooxaha ay uga duwan tahay hal arrin.wuxuu sheegay in hanka iyo niyadda ciyaartooyda ay sababto iney qaadaan koobab waaweyn.
Intii lagu jiray bandhigga, Mbappé wuxuu muujiyay sida uu ugu faraxsan yahay inuu xirto funaanadda Real Madrid, isagoo ballanqaaday inuu naftiisa u huri doono kooxda. Madaxweynaha Real Madrid, Florentino Pérez, ayaa ku soo dhaweeyay Mbappé, isagoo sheegay inuu yahay ciyaaryahan gaar ah oo ka caawin doona kooxda inay sii wado guulaha.
Mbappé wuxuu ka mid noqon doonaa weerarka Real Madrid oo ay ku jiraan Jude Bellingham iyo Vinícius Jr., taasoo rajo weyn gelinaysa taageerayaasha kooxda ee rajeynaya guulo waaweyn xilli ciyaareedkan.
