Kooxda kubadda cagta Manchester United ayaa qarka u saaran in lagu garaaco saxeexa xiddig ku jiray qorshaheeda suuqa iibka ciyaartoyda, kaas oo maamulka naadigu ay diyaarinayeen inay dalab ka gudbiyaan usbuucyada soo socda.
Manchester United oo kaalinta siddeedaad ku dhamaysatay xilli-ciyaareedkan balse uu caawiyey koobka FA Cup ee ay ku guuleysteen oo sabab u noqday inay usoo baxaan Europa League, ayaa waxa qorshahooda suuqa iibka ku jiray difaaca kooxda Fulham ee Tosin Adarabioyo oo ay doonayeen inuu u beddelo Raphael Varane.
Laakiin Sky Sports ayaa sheegay in kooxda reer London ee Chelsea ay dalab ka gudbisay Tosin Adarabioyo oo ay uga hormartay Manchester United, waxaanay u doonayaan inuu buuxiyo booska uu banneeyey Thiago Silva oo ka tegay usbuucan horraantiisii.
Tosin Adarabioyo oo kasoo baxay kulliyadda da’yarta Manchester City ayaa diiday inuu heshiis cusub u saxeexo Fulham iyadoo qandaraaskiisuna ku egyahay dhamaadka bisha June ee usbuuca dambe bilaabmi doonta.
26 jirkan ayaa ka sokow Manchester United iyo Chelsea waxa doonaysa Newcastle United oo uu tababare Eddie Howe si shaqsi ah uga shaqaynayo sidii uu gacanta ugu dhigi lahaa.
