Madaxweynaha Argentina oo ku jeesjeesay Neymar isagoo leh “wuxuu jecel yahay xafladaha iyo tumashada” kadib guushii weynayd ee ay ka gaareen Brazil isreeb-reebka Koobka Adduunka.
Madaxweynaha Argentina ayaa Neymar ku ganay hadal jeesjees ah oo ah “wuxuu jecel yahay xafladaha iyo tumashada” si uu usii huriyo dhaawaca Brazil kadib guuldaradii ay kala kulmeen isreeb-reebka Koobka Adduunka.
Xulka Argentina ayaa wax badan dabaaldegay Talaadadii, xitaa ka hor inta aysan garoonka la gelin Brazil, maadaama ay si rasmi ah u xaqiijisteen boosaskooda Koobka Adduunka 2026 kadib markii Bolivia iyo Uruguay ay galeen barbaro gool la’aan ah. Dabaaldegyada ayaa sii socday habeenkii Buenos Aires markii ay 4-1 ku xasuuqeen xulka Brazil, inkastoo uu ka maqnaa xiddigooda Lionel Messi.
Neymar, oo laga filayay inuu dib ugu soo laabto xulka qaranka kulamada Colombia iyo Argentina, wuxuu ka haray safka daqiiqadihii ugu dambeeyay sababo la xiriira dhaawac muruqa ah oo uu kasoo gaaray kooxda Santos. Maqnaanshihiisa lama ilaawin, waxaana madaxweynaha Argentina, Javier Milei, uusan ka waaban inuu weerar afka ah ku qaado xiddiga reer Brazil kadib guushii xulkiisu ka gaaray Selecao.
Milei ayaa si jeesjees ah u yiri: “Marka la eego sida Neymar uu jecel yahay xafladaha iyo tumashada, waa yaab inuu ka maqnaaday dabaaldeggaan.”
