Wariyaha beIN Sports horana uga soo shaqeeyay Sky Sports Richard Keyd ayaa sheegay in Liverpool ay sameyneyso qalad la mid ah midkii Manchester United madaama ay tababare u magacaabayaan Arne Slot.
Richard Keys ayaa xusay inay tahay qalad aad u weyn in Liverpool ay tababare u magacowdo tababaraha Feyenoord Arne Slot.
67 jirkaan ayaa magacaabista Slot la barbardhigay magacaabistii Man United ee Erik ten Hag kaasoo ku fashilmay shaqada Old Trafford labo xilli ciyaareed uu hayo.
Richard Keys isagoo ka hadlayay qaladka weyn ee ay Liverpool sameyneyso ayaa yiri:
“Waxaan aaminsanahay in Liverpool ay sameyneyso qaladkii ay sameysay Manchester United.
“Arne ten Slot. xaqiiqdii ma ninkaan ayaa la magacaabayaa? Aniga ahaan ilama fiican. Fekerkaana keli kuma ihi. Taageere Liverpool walba oo aan la hadlay kuma faraxsana in ten Slot uu bedelo Jurgen Klopp.
“Ok. Aan fursad siino. Waan aqbalayaa inaynan aqoonin isaga. Waxa uu noqon karaa tababare weyn. Laakiin taasi igama dhaadhacsana.”
“Waa maxay sababta ten Slot loo magacabaayo? waan ogahay magaciisa ma ahan ten Slot laakiin Ten Hag yare! miyuusan aheyn? Waan xaqiijin karaa inaan ka maqli doono wax la mid ah wixii aan ka maqalnay Ten Hag marka ay Liverpool soo bandhigto. Kama maqli doontid isagoo qiranaya inuusan aheyn dookhooda koowaad. Ama rikoodhkiisa Holland inuusan u fiicneyn sida rikoodhkii ten Hag”
