Liverpool ayaa qorsheynaysa inay iibiso Luiz Diaz si ay lacag ugu helaan maalgelinta kooxda, xilli xiisaha loo qabo uu sii kordhayo.
Sida uu sheegay sarkaal hore oo ka tirsanaa Man United iyo Blackburn, Mick Brown, oo si weyn ula socda arrimaha kubadda cagta, Liverpool waxay qorsheyneysaa inay dib u habeyn ku sameyso weerarkeeda xagaagan, sida uu si gaar ah ugu sheegay Football Insider.
Arne Slot wuxuu doonayaa inuu kooxdiisa ku xoojiyo weeraryahan heer caalami ah, xitaa haddii Mohamed Salah baxo ama uusan bixin, laakiin si taasi u dhacdo waa inay ciyaaryahan iska diraan si boos loo helo.
Diaz, oo 28 jir ah, ayaa loo arkaa inuu yahay xiddig ay Liverpool iibin karto tan iyo xagaagii hore, markaas oo Football Insider ay daaha ka rogtay inay diyaar u yihiin dalabyo ka badan £50 milyan.
Xilli ciyaareedkan, Diaz wuxuu saftay 35 kulan tartamada oo dhan, 26 ka mid ahna wuu ku soo bilowday, isagoo dhaliyay 13 gool isla markaana caawiye ka noqday saddex gool.
Si kastaba ha ahaatee, Liverpool waxay dooneysaa inay xagaaga keensato weeraryahan toos ah, waxayna u badan tahay in bixitaanka xiddiga reer Colombia ay fursad u noqoto iney helaan maal gelin xooggan.
