Liverpool ayaa la filayaa inay iska fasaxdo Federico Chiesa dhamaadka xilli ciyaareedkan, iyadoo la rumeysan yahay inuu dib ugu laaban doono Talyaaniga iyo Serie A.
Kooxda Reds ayaa la sheegaya inay diyaar u tahay inay iska fasaxdo Chiesa kadib markii ay arkeen inuu ku guuldareystay inuu saameyn muuqata ku yeesho Anfield tan iyo markii ay lasoo wareegeen xagaagii hore.
Sida laga soo xigtay wargeyska Calciomercato, Liverpool waxay si rasmi ah u macasalaamayn doontaa xiddigan, iyadoo suurtagal tahay inuu ku laabto horyaalka Serie A, oo ah meesha ugu macquulsan ee uu u wareegi karo.
Chiesa ayaa la daalaa dhacayay dhaawacyo tan iyo markii uu soo muuqday intii lagu jiray guushii xulka Italy ee Euro 2020. Juventus ayaa ugu dambeyn ka niyad jabtay xaaladdiisa, waxaana ay si la yaab leh ugu fasaxday Liverpool qiimo aad u jaban oo gaaraya £12.5 milyan ($16.2m). Si kastaba ha ahaatee, garab-kan reer Talyaani ayaa xaalad ka xun tii Juventus la kulmay Liverpool, isagoo saftay kaliya 11 kulan tartamada oo dhan, halka uu Premier League ka ciyaaray 25 daqiiqo oo kaliya.
Waxaa la rumeysan yahay in Napoli ay tahay kooxda ugu dhow ee la wareegi karta Chiesa. Macallinka cusub ee Napoli, Antonio Conte, ayaa aad u xiiseynaya adeegiisa, gaar ahaan maadaama kooxda aysan wali helin badalka Khvicha Kvaratskhelia, kaasoo bishii Janaayo ku biiray Paris Saint-Germain. Waxaa sidoo kale la sheegay in Manchester United ay si dhow u raadineyso Alejandro Garnacho, taasoo sii xoojineysa suurtagalnimada in Napoli ay lasoo wareegto Chiesa.
Liverpool ayaa hadda u muuqata mid qiratay in Chiesa uusan ku habboonayn qorshaha tababare Arne Slot, taasoo la micno ah inay u fududaynayso inuu dib ugu laabto Talyaaniga si uu dib ugu dhiso xirfadiisa ciyaareed.
