Kooxda kubadda cagta Real Madrid ayaa diyaarisay lacagta ay u qorshaysay inay Liverpool kaga soo qaadato difaaca midig ee reer England ee Trent Alexander-Arnold oo qandaraaskiisa Anfield uu sannad kali ahi ka hadhsan yahay, kaas oo illaa hadda aan ogolaanin inuu heshiis cusub saxeexo.
25 jirkan ayaa ay Real Madrid doonaysaa inuu u beddelo laacibka sii duqoobaya ee Dani Carvajal oo ay da’diisu tahay 32 jir.
Carlo Ancelotti ayaa la sheegay inuu dabada ka riixayo qorshaha Real Madrid ee Trent Alexander-Arnold, isaga oo la dhacsan hal-abuurkiisa, sida uu kubbadaha weerarka u geeyo, awooddiisa laadka xorta ah iyo tuuryada dheer ee ay ku ladhan tahay caawintu.
Wali labada kooxood ma aanay wada-hadal, balse Real Madrid ayaa la sheegay inay u qorshaysay dalabka koowaad ee tijaabada ah ee Alexander-Arnold lacag dhan £75 milayn oo Gini, sida uu qoray wargeyska The Sun ee kasoo baxa waddanka UK.
Bixitaanka tababare Jurgen Klopp oo dhamaadka xilli-ciyaareedkan ka tegaya Liverpool ayaa la sheegay inay fursad u noqon karayso Real Madrid, laakiin maamulaha guud ee kooxda ee Michael Edwards oo dhowaan xilkaas loo magacaabay iyo Richard Hughes oo isaguna noqday agaasimaha ciyaaraha Liverpool ayaa awoodda saaraya sidii ay kooxda ugu sii hayn lahaayeen ee ay heshiisyo cusub uga saxeexi lahaayeen Alexander-Arnold, Mohamed Salah iyo Virgil van Dijk.
