Tababaraha Liverpool Arne Slot oo Magacaabay Kooxda ‘Ugu Wanaagsan Yurub’ Hadda, Mana Ahan Kooxdiisa.
Tababaraha Liverpool, Arne Slot, ayaa aaminsan in Real Madrid ay weli tahay ‘kooxda ugu wanaagsan Yurub’ xilligan.
Hadalka Slot ayaa yimid maalmo un kaddib markii kooxdiisu ay 2-0 kaga badisay Real Madrid kulan Champions League ah, halkaas oo Reds ay si buuxda uga awood sheegteen kooxda reer Spain laga bilaabo bilowga ilaa dhammaadka ciyaarta.
Inkasta oo ay jiraan sababo badan oo hadda loogu aqoonsan karo Liverpool inay tahay kooxda ugu fiican Yurub, Slot wuxuu weli aaminsan yahay in Real Madrid ay haystaan tirada ugu badan horyaalka Champions League,taasina ay ka dhigeyso kooxda ugu fiican Europe.
“Si aad u garaacdo koox sida Real Madrid ah, waxyaabo badan ayaa loo baahan yahay inaad wax ka beddesho – qaab ciyaareedka ciyaartoyda, jawiga taageerayaasha, diyaar garowga, rabitaanka. Waxaas oo dhan way jireen,” ayuu Slot ku qoray bartiisa ka hor kulanka ay la ciyaarayaan Man City.
Wuxuu intaas ku daray: **“Tani micnaheedu maaha inay ahayd ciyaar qumman, sababtoo ah tababare ahaan waxaad mar walba ku dadaalaysaa inaad gaarto heer sare oo laga yaabo ineysan macquul aheyn, laakiin dhammaan waxyaabihii muhiimka ahaa ee aad rabtay way dhici karaan.
“Wax badan ayaan ka helay waxa aan arkay. Mar kale, ma ahayn wax walba, laakiin wax badan. Mid ka mid ah waxyaabihii aan ugu jeclaa waxay ahayd in qof walba laga bilaabo ciyaartoyda ilaa taageerayaasha ay guusha u arkeen farxad weyn.
“Tani micnaheedu maaha in aan yareynayo muhiimadda guusha ama aan hoos u dhigayo, balse sida aan sheegay ciyaarta kaddib, waxay ahayd guul heerka guruubyada ah, ma ahayn guul marxaladaha dambe ama finalka. Dabcan, waan ku raaxaysannay waana u dabaaldegay, laakiin sidoo kale waan ognahay in shaqo badan ay weli naga dhiman tahay.”**
