Manchester City ayaa lagu soo warramayaa inay qorsheynayaan inay lasoo saxiixdaan Paul Pogba, xiddigii hore ee Manchester United, kaasoo hadda ah ciyaaryahan xor ah kadib markii heshiiskiisii Juventus si wadajir ah loo kansalay.
Pogba, oo ganaax ku maqnaa kadib markii lagu helay isticmaalka DHEA – maaddo kor u qaadda soo saarista hormoonnada jirka – ayaa ganaaxiisa la dhimay 18 bilood bishii October kadib rafcaan guuleystay. Tani waxay u ogolaanaysaa inuu ciyaarista dib u bilaabi karo bisha Maarso.
Warbixin uu qoray Miguel Delaney oo ka tirsan The Independent ayaa Sabtidii lagu sheegay in City ay ka fiirsaneyso inay soo qaadato Pogba, iyadoo tababaraha kooxda, Pep Guardiola, uu yahay taageere weyn oo xiddiga reer France ah.
City, oo xilli ciyaareedkan ku dhibaatoonaysa khadka dhexe, ayaa u aragta Pogba inuu yahay xal macquul ah, iyadoo kooxda kaliya hal guul gaartay 10-kii kulan ee ugu dambeeyay. Pogba ayaa sidoo kale horay u shaaciyay in City ay xiiseyneysay saxiixiisa ka hor inta uusan ku laaban Juventus 2022.
Si kastaba ha ahaatee, wararka ayaa sheegaya in Pogba uu ka warwareegayo inuu ku laabto Manchester ama xitaa England guud ahaan, isagoo hore ugu soo ciyaaray United laba xilli oo kala duwan. Waxaa xusid mudan inuu laba gool u dhaliyay Red Devils kulankii caanka ahaa ee ay 3-2 ku garaaceen City isagoo ku sugnaa Etihad Stadium.
Pogba ayaa ku faraxsan inuu dib ugu soo laabto ciyaarista kubadda cagta waxaana lala xiriirinayaa kooxo dhowr ah oo kale, balse haddii uu ku biiro City, waxay noqon doontaa mid ka mid ah heshiisyada ugu xiisaha badan ee dhowaanahan.
