Gabriel Jesus: Su’aasha Uu Waligii Mikel Arteta Weydiin Doonin
Gabriel Jesus ayaa shaaca ka qaaday inuusan marnaba u tegi doonin tababaraha Arsenal, Mikel Arteta, si uu uga dalbado inuu kusoo bilaabo safka koowaad, xitaa isagoo soo bandhigay kulankii hore qaab ciyaareed fiican ka hor kulanka Premier League ee ay la leeyihiin Crystal Palace.
Weeraryahanka reer Brazil ayaa la daalaa dhacayay sanad adag oo ay ku jireen dhaawacyo iyo kalsooni darro, taasoo keentay inuu waayo booskiisii joogtada ahaa, iyadoo Kai Havertz uu noqday doorashada koowaad ee Arteta.
Si kastaba ha ahaatee, Jesus ayaa xasuusiyay qof walba tayadiisa isagoo saddexleey dhaliyay guushii 3-2 ee Arsenal ka gaartay Palace ciyaartii Carabao Cup.
Inkasta oo Arteta uu wajahayo go’aan adag oo ku saabsan cidda hoggaamin doonta weerarka Arsenal kulanka Selhurst Park, Jesus ayaa caddeeyay inuusan codsi ku weydiisan doonin booskaas.
“Hal mar oo kaliya ayaan albaabka tababare garaacay nolosheyda,” ayuu Jesus qirtay.
“Waxaan garaacay albaabka Pep Guardiola – ma ahayn inaan ka cabanayo, laakiin si aan u weydiiyo meelaha aan ka liito. Marnaba albaabka Mikel ma is taagi doono anigoo leh, ‘Waxaan rabaa inaan ciyaaro.’”
Jesus ayaa sidoo kale ka hadlay cadaadiska lala xiriiriyo ciyaaryahannada weerarka ka ciyaara.
“Cadaadiska lagu doonayo inaad goolal dhaliso waligiis wuu jiri doonaa. Waxaan ahay gool-dhaliyaha Arsenal. Xitaa haddii aan 10 gool dhaliyo, waxay codsan doonaan 20 – haddii ay 20 tahay, waxay codsan doonaan 30. Tani waa nolosheyda.”
Arteta ayaa amaanay qaab ciyaareedka Jesus kadib saddexleeydiisii, isagoo tilmaamay saameynta wanaagsan ee uu ku yeeshay kooxda.
“Qof walba oo kooxda kamid ah aad ayuu ugu farxay, sababta oo ah wuxuu ka caawiyay kooxda inay guul gaarto oo u gudubto semi-finalka,” ayuu yiri Arteta.
“Waxaad si cad u arki kartaa jawaab celinta degdegga ah – dhoolla-caddeyn weyn oo wejigiisa ka muuqata, tamar badan oo ku hareeraysan. Taas ayaa ah waxa aan u baahan-nahay.”
Welina lama oga haddii Arteta uu dooran doono Jesus ama Havertz si uu u hogaamiyo weerarka Arsenal kulanka Palace, balse is-hoosaysiinta iyo go’aanka Jesus ayaa si weyn u kordhiyay fursadihiisa uu ku heli karo booskaas.
