Enzo Maresca: Moises Caicedo Waa Heerka Declan Rice iyo Rodri
Tababaraha Chelsea, Enzo Maresca, ayaa sheegay in Moises Caicedo uu hadda u qalmo in lagu daro heerka ciyaartoyda khadka dhexe ee ugu sarreeya sida Declan Rice iyo Rodri, kadib qaab ciyaareed wanaagsan oo uu soo bandhigay xilli ciyaareedkan.
Caicedo, oo Chelsea kaga soo biiray Brighton heshiis 115 milyan ginni ah sannadkii hore, ayaa ku dhibtooday xilli ciyaareedkiisii ugu horreeyay, taas oo dhalisay dhaleecayn xooggan. Si kastaba ha ahaatee, xiddiga Ecuador ayaa haatan ka mid ah kuwa ugu muhiimsan kooxda.
Dhanka kale, Declan Rice ayaa sii wada inuu door muhiim ah ka ciyaaro khadka dhexe ee Arsenal. Maresca ayaana ku adkaystay in Caicedo uu la siman yahay Rice.
“Waa hubaal, waxa uu la heer yahay Declan Rice. Taas shaki kuma jiro,” ayuu yiri Maresca.
Isagoo ka hadlayay dhaawaca Rodri ee Manchester City, ayuu Maresca intaas ku daray:
“Nasiib darro, Rodri waa dhaawacmay, laakiin Declan wuu ciyaarayaa. Waxaan filayaa in Moises uu miiskaas la fadhiisan karo marka laga hadlayo ciyaartoyda khadka dhexe ee heerka sare ah.”
Hadalkan ayaa imanaya iyadoo Chelsea ay sii waddo inay ku tiirsanaato waxqabadka Caicedo si ay u xoojiso qaab ciyaareedkeeda xilli ciyaareedkan.
