Kooxda kubadda cagta Manchester United ayaa diiwaangelisay dhaawacyada saddex ciyaartoy oo cusub oo tirada xiddigaha ka dhaawacmay xilli-ciyaareedkan ka dhigaya 60 ciyaartoy.
Manchester United oo Axadda la ciyaaraysa kooxda heerka labaad ee Coventry City wareegga semi-finalka FA Cup ayaa waxa ka dhaawacmay da’yarkii uga soo baxay kulliyadda ee khadka difaaca uu tababare Jurgen Klopp ka ciyaarsiinayey usbuucyadii tegay ee Willy Kambwala, kaas oo ku biiray liiska ciyaartoyda ka maqnaanaya kulankan.
Waxa kale oo Manchester United aanay heli doonin labada ciyaartoy ee khadka dhexe ee Mason Mount oo dib ugu laabtay dhaawac uu muddo u jiifay iyo Sofyan Amrabat oo inta badan aan fursad la siinin.
Dhibaatada ugu badan ee Manchester United ayaa ah khadka difaaca oo ay ka sokow Willy Kambwala waxa kale oo ka dhaawacan Raphael Varane, Lisandro Martinez, Jonny Evans iyo Victor Lindelof.
Laakiin warka fiican ee uu tababare Erik ten Hag helay ayaa ah inuu taam noqday difaaca dhexe ee reer England ee Harry Maguire oo lagu soo daray liiska ciyaartoyda Man United ee kulanka Axadda.
