Dorival Júnior, oo dhawaan loo magacaabay tababaraha xulka qaranka Brazil, ayaa la sheegay in laga eryay xilkaas, sida laga soo xigtay warbixin ay daabacday UOL Esporte. Madaxweynaha Xiriirka Kubadda Cagta Brazil (CBF), Ednaldo Rodrigues, ayaa la filayaa inuu kulan la yeesho Dorival galabnimada maanta si ay uga wada hadlaan arrimaha la xiriira shaqadiisa, inkastoo go’aanka lagu eryayo horey loo gaaray.
Dorival Júnior, oo 61 jir ah, ayaa horey u soo maamulay kooxo badan oo caan ah oo ka dhisan Brazil, sida Flamengo iyo São Paulo. Waxa uu ku guuleystay Copa Libertadores sanadkii 2022 isagoo leylinayay Flamengo ka hor inta uusan ku biirin São Paulo.
Bishii Janaayo ee sanadkii hore, waxa uu iska casilay xilka tababarenimo ee São Paulo si uu u qabto shaqada tababaraha xulka qaranka Brazil.
Magacaabistiisa ayaa timid kaddib markii CBF ay ku guuldarreysatay inay heshiis la gaarto Carlo Ancelotti, kaasoo doortay inuu cusbooneysiiyo qandaraaskiisa Real Madrid ilaa Juun 2026.
Si kastaba ha ahaatee, warbixinta UOL Esporte ma bixinin faahfaahin dheeraad ah oo ku saabsan sababaha ka dambeeya go’aanka lagu eryayo Dorival Júnior. Xiriirka Kubadda Cagta Brazil ayaan weli si rasmi ah u xaqiijin warbixintan, waxaana la sugayaa bayaan rasmi ah oo ka soo baxa CBF si loo ogaado xaqiiqada arrintan.
Haddii warbixintan ay sax tahay, CBF waxay u baahan doontaa inay si degdeg ah u raadiso beddel ku habboon oo hogaamiya xulka qaranka, maadaama ay jiraan tartamo muhiim ah oo soo socda.
