Darwin Nunez oo dhawaan ka tirtiray akoonkiisa Instagram dhamaan sawiradii la xiriira Liverpool ayaa aamusnaanta ka baxay isagoo fariin u diray xiddigii hore ee Liverpool Luis Suarez.
Talaabada uu ciyaaryahanka kaga masaxay Liverpool barahaiisa bulshada ka dib kulankii ay Reds 4-2 kaga badisay Tottenham Axadii la soo dhaaftay ayaa keentay in si weyn looga hadlo mustaqbalkiisa Anfield.
Si kastaba tan iyo waqtigaas, Nunez ayaa galay aamusnaan dhanka baraha bulshada ah isagoo aan waxba soo dhigin islamarkaana aan wax faalo ah bixinin.
Laakiin taasi haatan waa ay soo dhamaatay ka dib markii uu falcelin ka sameeyay qoraal uu shabakada X soo dhigay weeraryahankii hore ee Liverpool Luis Suarez oo u dabaaldegayay inuu habeenkii Isniinta dhaliyay goolkiisii 500aad.
Nunez ayaa u qoray: “Waxaad tahay xiddiga aan ku daydo” wuxuuna raaciyay emoji wadno iyo muruq ah.
Ídolo! 😍💪🏽
— Darwin Núñez (@Darwinn99) May 7, 2024
Nunez weli ma shaacinin sababta ka danbeysa inuu sawiradii Liverpool ka masaxo akoonkiisa, sidoo kale waxa uu Twitter ku block-gareeyay dhamaan akoonada taageerayaasha Liverpool ee caanka ah taasoo loo qaatay inuu uga jawaabayo eedeymaha loo soo jeedinayay isbuucyadii ugu danbeeyay oo uu fursado badan qasaariyay.
