Bukayo Saka Oo Digniin U Diray Liverpool Iyo Manchester City Kadib Guushii Arsenal ay ka gaartay Westham.
Bukayo Saka ayaa uga digay kooxaha Liverpool iyo Manchester City in Arsenal ay dib u heshay qaab-ciyaareedkeedii ugu fiicnaa kaddib saddex guulood oo xiriir ah oo ay si cajiib ah u gaareen toddobaadkan.
Arsenal ayaa u soo kacday kaalinta labaad ee horyaalka Premier League kaddib markii ay fiidkii sabtida 5-2 ku xasuuqeen West Ham United.
Gunners ayaa sidoo kale shan gool ku xasuuqday Sporting CP tartanka Champions League Talaadadii, intaas ka horna waxa ay 3-0 ku garaaceen Nottingham Forest usbuucii hore.
Saka oo la hadlayay warbaahinta ayaa yiri:
“Dhab ahaantii, saddexdii kulan ee ugu dambeysay, waxaan dib ugu soo laabanay heerkeennii ugu fiicnaa, qaab-ciyaareedkeennii ugu wanaagsanaa.
“Waxaan nahay kuwo isku xiran, firfircoon, waxaadna arkeysaa dhaqdhaqaaqyada, is-beddelka boosaska, wax walba way fiican yihiin. Waa inaan sidaan ku sii soconnaa, saddex kulan oo weyn ayaan ciyaarnay laakiin waxaan ognahay in tan oo kaliya aysan ku filneyn horyaalkaan.”
“Cid kastoo tartan nagula jirta howl ayaa u taalla,waan soo laabannay.”
