Taageerayaal careysan oo England u dhashay ayaa weerar ku qaaday kooxda Aston Villa ka dib qoraal iyo sawir ay soo dhigeen bogooda rasmiga ah ee Twitter intii uu socday kulankii England vs Belgium.
England ayaa barbaro 2-2 ah la gashay Belgium xalay oo Talaado aheyd, ka dib markii ay guuldaro 1-0 ah kala kulmeen Brazil todobaadkii hore.
Belgium ayaa goolka furitaanka waxaa u dhaliyay Youri Tielemans kaas ka faa’ideystay qalad uu sameeyay goolhaye Jordan Pickford.
Ivan Toney ayaa barbareeyay ciyaarta isagoo dhaliyay goolkiisii ugu horeeyay ee England kulankiisii ugu horeysay ee caalami ah.
Romelu Lukaku ayaa Tielemans u dhigay goolkii labaad ee Belgium, Jude Bellingham ayaase gool soo daahay oo waqtigii dhimashada aheyd ku barbareeyay xulka Belgium.
Labada gool ee Tielemans ayaa waxaa u dabaal dagay kooxdiisa Aston Villa oo baraha bulshada ku amaanay xiddigooda khadka dhexe.
Kooxda Premier League ayaa soo galisay sawirka ciyaaryahanka khadka dhexe ee Belgium oo u dabaaldegaya goolkiisa, iyadoo ay la socoto ciwaan ahaa: “DU DU DU DU DU DU YOURI TIELEMANSSS.”
Laakin taageereyaasha Ingariiska ah ayaa aad uga carooday Aston Villa iyagoo ku eedeeyay khiyaamo qaran madaama ay u dabaaldegeen xiddig labo gool ka dhaliyay dalkooda.
Mid ka mid ah isticmaalayaasha shabakada X ayaa yiri: “Maxay Aston Villa u taageereysaa Belgium?”
Mid labaad ayaa soo qoray: “Kooxda Ingiriiska oo u dabaaldegeysa ciyaaryahan ajnabi ah oo gool ka dhaliyay dalkooda hooyo?”
Mid saddexaad ayaa yiri: “Waxaad tihiin naadi Ingiriis ah. Waxani waa ceeb.”
Mid afraad ayaa bartiisa twitterka ku soo qoray: “Tani waa yaab, ma arkeysid dalal kale oo sidaan sameynaya.”
Mid kale ayaa yiri: “Wuxuu la ciyaarayaa England, tani waa qariib.”
Tielemans waxa uu Villa ugu biiray xagaagii hore beeca xorta ah ka dib markii uu dhacay heshiiskii Leicester City.
Waxa uu saftay 37 kulan tartamada oo dhan xilli ciyaareedkan isaga oo dhaliyay laba gool.
