Arsenal ayaa weli ku jirta tartanka horyaalka ka dib markii ay xasuuqeen kooxda kaalinta hoose ee Sheffield United oo ay 6-0 ku garaaceen ciyaar ka dhacday garoonka Bramall Lane.
Gunners ayaa dooneysay inay ku dhawaato kooxaha ay horyaalka ku xafiiltamayaan ee Liverpool iyo Manchester City oo soo badiyay kulamadoodii todobaadkan, laakiin cabsidii ay qabeen waxay dhamaatay kaliya 25 daqiiqo markii ay socotay ciyaarta markaasoo ay hogaanka ku hayeen afar gool.
Martin Odegaard ayaa goolasha furay ka hor inta uusan Jayden Bogle goolka iska dhalinin, waxaa ku xigay golal ay kala dhaliyeen Gabriel Martinelli iyo Kai Havertz.
Declan Rice ayaa ka dib ku daray goolkii shanaad afar daqiiqo ka hor waqtigii nasashada iyadoo Arsenal ay barbareysay rikoodhka goolasha ugu badan ee hal koox ay dhalisay qeybta hore ee ciyaar Premier League ah.
Sheffield United ayaa soo bandhigtay qaab ciyaareed xun, taasoo keentay Ben White uu goolka lixaad ugu shubo ka hor inta aan la gaarin daqiiqadii 60aad.
Natiijadaan ayaa la micno ah in Arsenal ay weli labo dhibcood ka danbeysa kooxda hogaanka heysa ee Liverpool kuwaasoo isbuuca soo socda la ciyaaraya kooxda kaalinta labaad ee Manchester City.
Arsenal ayaa haatan hamineysa inay badiso kulankii 8aad ee isku xigta ee horyaalka iyagoo markaas hogaanka u qaban doona horyaalka ka hor kulanka Axada ee Reds iyo Man City marka ay martigeliyaan Brentford Sabtida.
