“Dhibaatada Mbappe waa Dhibaatada Real Madrid,” ayuu yiri Tababare Ancelotti
Tababaraha Real Madrid, Carlo Ancelotti, ayaa Sabtidii sheegay in dhibaatooyinka xiddiga weerarka ah Kylian Mbappe xilli ciyaareedkan ay la xiriirto guud ahaan kooxdiisa oo aan lahayn joogteyn.
Weeraryahanka reer Farance ayaa rigoore khasaariyay Arbacadii intii lagu jiray guuldaradii ay Real Madrid ka soo gaartay Liverpool tartanka Champions League, taasoo ahayd guuldaradii saddexaad ee shan kulan gudahood ay ku wajahayaan tartankaas.
Mbappe, oo kooxda ku soo biiray xagaagii markii uu dhamaaday qandaraaskiisa Paris Saint-Germain, ayaa si weyn loo dhaleeceeyay bandhigiisa. Waxa uu kaliya labo gool ka dhaliyay sagaalkii kulan ee ugu dambeeyay ee uu u ciyaaray Madrid.
“Dhibaatada Mbappe waa dhibaato aan dhammaanteen leenahay,” Ancelotti ayaa sidaas ku yiri shirkiisa jaraa’id ka hor kulanka La Liga ee Axadda ay la ciyaarayaan Getafe.
“Fikradda waa in aan isku dayno inaan siino nooca ugu fiican, ma aha oo kaliya isaga, balse aniga, ciyaartoyda kale, dhammaan kooxdaba.”
“Ma aha dhibaato hal ciyaaryahan ku kooban. Dhibaatada na heysato waa mid kooxeed oo ku saabsan inaanan awoodin inaan joogteyno qaab ciyaareed fiican. Waa inaan isku dayno inaan hagaajino taas, wax walba oo aan awoodno baan sameyn doonnaa.”
“Waxaa ka mid ah waxyaabaha jira, (Mbappe) wuxuu ku cusub yahay halkan, wuxuuna ku jiraa marxalad uu kula qabsanayo kooxda. Waxa uu dhaliyay siddeed gool, wuxuuna ka qeyb qaatay weerarka isagoo caawiyey goolal.”
“Haa, wuu u ciyaari karaa si ka fiican, laakiin dhammaanteen waan ka wanaagsanaan karnaa sidaan, waana isku dayi doonnaa.”
