Ruben Amorim Oo Fariin U Diray Marcus Rashford Kadib Markii Uu Ka carrooday Taageerayaasha Manchester United Intii Lagu Jiray Guuldaradii Arsenal.
Tababaraha Manchester United, Ruben Amorim, ayaa ku boorriyay Marcus Rashford inuu tixgaliyo taageerayaasha kooxda kadib markii uu dhaleeceyn kala kulmay ficilkiisa ka dib guuldaradii 2-0 ee ay Arsenal kala kulmeen Arbacadii.
Rashford, oo badal ku soo galay qeybtii labaad ee ciyaarta, ayaa ka qeyb qaatay kulanka Emirates Stadium oo goolal ka yimid Jurrien Timber iyo William Saliba ay guusha u xaqiijiyeen Arsenal.
Markii ciyaartu dhammaatay, ciyaartoyda United ayaa u dhaqaaqay dhinaca taageerayaashooda si ay uga mahadceliyaan safarkooda, laakiin muuqaal ayaa muujiyay Rashford oo si toos ah ugu socday dhinaca qolka labiska halka saaxiibadiis ay taageerayaasha u sacbinayeen.
Markii wax laga weydiiyay falka Rashford jimcadii, Ruben Amorim ayaa ku adkeystay in dhammaan ciyaartoyda United ay tahay inay taageerayaasha tixgeliyaan, gaar ahaan marka kooxdu guuldarreysato.
“Dabcan, waa inaan sidaas samaynaa, gaar ahaan marka aan guuldaraysano. Ma aha marka aan guuleysano, balse marka aan guuldaraysano,” ayuu yiri Amorim.
“Waan samayn doonaa, waana in qof kastaa sidaas sameeyo. Waxay noqon doontaa sidaas.”
Amorim ayaa sidoo kale xusay in kooxda oo dhan, oo ay ku jiraan Rashford, ay u baahan yihiin inay horumariyaan dhammaan dhinacyada ciyaarta.
“Waxaan haysanaa wax badan oo aan ku horumarino kooxda, ma ahan oo kaliya Marcus. Kooxda oo dhan waxay horumar ka samayn kartaa dhammaan dhinacyada ciyaarta.”
Hadalkan ayaa imanaya iyadoo Rashford uu waajahay cadaadis xooggan ka dib ciyaarta, halka Amorim uu doonayo inuu hubiyo in ciyaartoydu ay muujiyaan wadajir iyo ixtiraam dhanka taageerayaasha.
