Taageerayaasha Manchester United ayaa doonaya in mid ka mid ah xiddigahooda uu baxo xagaagan ka dib guushii 2-0 ay ka gaareen Everton.
Man United ayaa ku soo laabatay wadada guusha ee horyaalka Premier League kadib guuldaradii xiriirka ahayd ee Fulham iyo Manchester City.
Red Devils ayaa seddexda dhibcood ku xaqiijisay gurigeeda kulankii maanta ee Old Trafford, iyadoo Bruno Fernandes iyo Marcus Rashford ay qeybtii hore u dhaliyeen rigoorayaal.
Alejandro Garnacho ayaa Man United ka dhigay taariikh kadib bandhigiisii 45tii daqiiqo ee ugu horeeyay ee ciyaartii Old Trafford.
Laakiin Man United ciyaarta waxay ku bilaabatay si xun gaar ahaan daqiiqadihii ugu horeeyay.
Man United ayaa kubada iska qasaarineysay, iyagoo si taxadar laheyn u dhiibanayay kubada laakiin Everton ayaa ku guuldareysatay inay ka faa’ideysato.
Taageerayaasha Man United ayaa eeda oo dhan dusha ka saaray Casemiro, waxayna dareenkooda ku soo bandhigeen baraha bulshada.
Taageerayaasha careysan ayaa dalbaday in xiddiga reer Brazil la iibiyo dhamaadka xilli ciyaareedkan.
Taageere ayaa ku soo qoray shabakad X: “Ma rabo inaan Casemiro ku arko halkan xilli ciyaareedka soo socda, waan idiin baryayaa”
Mid labaad ayaa bartiisa Twitter-ka soo dhigay: “Waxba igama gelin xitaa haddii aad Casemiro u dirtaa dayada, kaliya kooxdeyda ka dheereeya.”
Mid saddexaad ayaa soo qoray: “Waan ka xumahay, laakiin Mainoo ayaa u muuqda inuu yahay xiddig shan jeer ku guuleystay UCL oo Madrid u soo ciyaaray halka Casemiro uu u muuqdo canug 18 jir kubad barad ah.’
Mid afraad ayaa ku daray: “Casemiro gabi ahaanba waa qashin In la yiraahdo wuu lumay waa waxa ugu fiican ee laga dheegi karo. Waa danbi lacagta badan ee uu inaga qaadanayo.”
Midka shanaad ayaa yiri: “Casemiro waa inuu baxo xagaaga. Way ka dhamaatay”
Casemiro ayaa u saxiixay Man United heshiis afar sano ah xagaagii 2022.
