Ben Chilwell ayaa aaminsan in ku guuleysiga Carabao Cup uu Chelsea uga weyn yahay ku guuleysigoodii Champions League ee sannadii 2021kii.
Daafaca bidix Chilwell oo 27 sanno jir ah ayaa qeyb libaax leh ka qaatay kooxdii Chelsea ee ku guuleysatay koobka Champions League.
Waxa uu kabtan u noqon doonaa kooxda Chelsea ee ka hortageysa Liverpool finalka Carabao Cup iyadoo Chelsea ay raadineyso koobkoodii ugu horeysay tan iyo markii uu milkiile Todd Boehly ku iibsaday 4.2 bilyan ginni sannadii 2022kii.
Chilwell ayaa yiri: “Sharafta Champions League dabcan waa mid aad u sareysa laakiin waxaan dhihi lahaa koobkaan ayaa inooga muhiimsan marka loo eego halka ay kooxda joogto.
“Marka la eego ciyaartoyda aan heysano oo ah kuwa da’ yar oo cusub, waxaa ina soo maray xilliyo hooseeya iyo kuwa sareeya xilli ciyaareedkan.
“Inaan ku guuleysano koobkaan, waxay noqon doontaa mid ka weyn ku guuleysigeenii Champions League, madaama ay tani tusaale u noqon doonto halka ay kooxda u socoto.”
Chilwell waxa uu doonayaa inuu ka aarsado Liverpool madaama kooxda Reds ay garaacday Chelsea finaladii Carabao Cup iyo FA Cup ee sannadii 2022kii.
Waxa uu yiri: “Finalkaan waa mid weyn sababo badan darteed. Xaqiiqda ah inay labo jeer naga badiyeen ciyaar final ah. Waxaan dooneynaa inaan aargoosano.
“Tan labaad waa koob weyn. Qof walba ayaa doonaya inuu ku guuleysto koob weyn. Waa final koob oo Wembley ka dhacaya.
“Aniga ahaan ma jirto wax iiga weyn final koob oo Wembley ah.”
