Xiddiga khadka dhexe uga ciyaara Real Madrid iyo xulka qaranka England ee Jude Bellingham ayaa jacayl u qaaday gabadh uu bartay App-ka Raya xagaagii, waxaana ugu dabayntii uu u muuqdaa inuu saldhigay oo uu helay gabadhii uu nolosha la qaybsan lahaa.
Bellingham oo xagaagii ay Real Madrid ku iibsatay £113 milyan oo Gini, ayaa waxa ay App-kaRaya iska heleen heesaaga caanka ah ee R&B ee Rmarni oo ay hadda si joogto ah u xidhiidhaan.
Qof la hadlay wargeyska The Sun, ayaa yidhi: “Xiddiga quruxda badan ee kubadda cagtu, waxa uu jacayl u qaaday fannaanadda qalanjada ah ee sawirradeedu ku sharraxaysay Instagram-ka bilihii tegay. Jude iyo Rmani way isku soo baxayaan, wayna iska heleen. Run ahaantii waa nooca dumarka uu jecel yahay Jude Bellingham.”
Jude Bellingham oo ku sugan waddanka Spain, waxa ay xidhiidhkooda jacayl ku wadaagaan telefoonka oo ay ka wada-hadlaan, sidoo kalena waxa ay isku diraan farriimo iyo sawirro, maadaama ay iyaduna deggen tahay Ingiriiska.
Gabadhan qalbiga ka xadday Jude Bellingham ee Rmarni, waxay kusoo caan-baxday heesteedii koowaad ee ‘So High’ oo ay soo qaadday sannadkii 2021.
