Weeraryahankii hore ee Liverpool, Luis Suarez, ayaa taageero la garab istaagay Darwin Nunez, kadib markii weeraryahanka Reds uu wajahay dhaleeceyn xoogan kaddib bandhig liitay oo uu sameeyay kulankii Aston Villa.
Nunez ayaa fursad dahabi ah ka qasaariyay kulankaas Reds, gaar ahaan gool bannaan oo uu ka cunay iyo mid kale oo uu si fudud uga badbaadiyay goolhayaha Emiliano Martínez, taasoo sababtay in Liverpool lumiso labo dhibcood oo muhiim ah kaddib barbardhac 2-2 ah.
Kulanka kaddib, Arne Slot ayaa si dadban u dhaliilay Nunez, isagoo su’aal geliyay dadaalkiisa iyo qaab ciyaareedkiisa.
Si kastaba ha ahaatee, Nunez wuxuu bartiisa bulshada soo dhigay fariin muujineysa inuu ka shaqeyn doono horumarkiisa, taasoo si deg deg ah u gaartay Suarez, oo jawaab dhiirrigelin leh u soo qoray:
“Dabcan, sidaas ayaan kugu jecelnahay! Taasi waa dabeecadda saxda ah, had iyo jeer si togan u fikir. Aan hore u soconno! 👊🏼⚽️”
Suarez, oo xilli ciyaareedyo cajiib ah kusoo qaatay Liverpool, ayaa marar badan ammaanay tayada Nunez, wuxuuna markale muujiyay inuu garab taagan yahay xiddiga ay isku wadanka yihiin.
