Gary Neville ayaa sheegay in Liverpool hadda yihiin ‘kuwa ugu cadcad’ inay ku guuleystaan horyaalka Premier League, isagoo Arsenal u arkaya kooxda ugu weyn ee kula tartami doonta.
Liverpool ayaa afar dhibcood oo nadiif ah hoggaanka ku heysa horyaalka Premier League ka dib markii kooxda Arne Slot ay 6-3 ku burburisay Tottenham Axaddii.
Kooxda Reds ee kula tartameysa horyaalka, Arsenal, ayaa 5-1 ku xaaqday Crystal Palace horraantii usbuuca, laakiin kooxda kaalinta labaad ku jirta ee Chelsea ayaa barbaro 0-0 la gashay Everton, taasoo keentay inay dhibco lumiyaan.
Neville ayaa sheegay in Chelsea, oo la filayey inay xilli ciyaareed adag la kulanto, ay wacdarro dhigeyso xilli ciyaareedkan, balse wuxuu sheegay inuu filayo in Arsenal ay noqoto kooxda ugu weyn ee Liverpool kula tartami doonta horyaalka.
Arsenal ayaa si dirqi ah laba jeer ugu dhawaatay inay ku guuleysato horyaalka Premier League iyadoo uu hoggaaminayo macalin Arteta, balse Manchester City ayaa labada jeer ba ku guuleysatay. Neville ayaa sheegay inuu ku kalsoon yahay inay markale tartami doonaan.
Kooxda difaacaneysa horyaalka ee Manchester City ayaa si cad uga baxday tartanka kaddib markii qaab ciyaareed xun uu ka tuurat kaalinta toddobaad, iyadoo 12 dhibcood ka dambeysa Liverpool.
“Liverpool waa kooxda ugu fiican Premier League waqtigan,” ayuu Neville ka sheegay barnaamijkiisa Sky Sports kaddib ciyaartii layaabka lahayd ee ka dhacday garoonka Tottenham Hotspur.
“Waa kuwa ugu cadcad hanashada horyaalka. Hoos u dhaca Manchester City waa mid aad u weyn, mana hubo qof garanaya sida xaalkaas u xumaaday.
“Chelsea waxay la kulantay ciyaar adag, laakiin si wanaagsan ayey wax u wadaan,xilli ciyaareed wanaagsan ayeyna ku jiraan.
“Kooxda kaliya ee Liverpool u baahan tahay inay iska jirto waa Arsenal.Waxey awoodaan iney dhibcaha soo yareeyaan bisha Maarso iyo Abriil.
“Laakiin waqtigan Liverpool waa kuwa ugu cadcad. Waxaan filayaa in qatarta ugu weyn ee ku soo fool leh ay tahay dhaawacyo – haddii ay waayaan Van Dijk iyo Salah, way ku adkaan doontaa iney horyaalka u tartamaan.”
Neville wuxuu sheegay in ilaalinta fayaqabka Van Dijk ay aad muhiim u tahay si Liverpool ay guulaha u sii wado.
Tababaraha Liverpool, Arne Slot, ayaa sheegay inuu aad ugu qanacsanaa bandhiggii kooxdiisu muujisay ciyaartii Tottenham, halkaasoo ay ku dhaliyeen lix gool, taasoo soo bandhigtay daciifnimada difaaca Spurs.
