Mbappe Oo Kashifay Kooxdii Uu Ka Ciyaari Lahaa Haddii uusan imaan laheen Real Madrid.
Weeraryahanka kooxda Real Madrid, Kylian Mbappe, ayaa shaaca ka qaaday kooxda uu ka ciyaari lahaa haddii uusan ku biiri laheen Real Madrid.
Mbappe, oo xagaagii si xor ah uga soo wareegay Paris Saint-Germain (PSG) kuna biiray Real Madrid, ayaa sheegay in haddii uusan ku biiri laheen kooxda reer Spain uu sii joogi lahaa PSG isla markaana uu heshiis cusub la gali lahaa.
Xiddiga reer France ayaa lala xiriirinayay kooxo badan oo waaweyn oo ka dhisan Yurub, oo ay ku jiraan Liverpool, kahor inta uusan ugu dambayn u wareegin Real Madrid.
Isaga oo la hadlaya beIN Sports, Mbappe ayaa sheegay:
“Mar walba waxaan sheegay in PSG ay tahay mid ka mid ah kooxaha ugu waaweyn France iyo adduunka. Kaliya waxaan PSG uga tagay Real Madrid. Haddii aanan ku biiri laheen Real Madrid, waxa aan sii joogi lahaa PSG inta ka dhiman xirfaddayda.”
Hadallada Mbappe ayaa xoojinaya sida uu ugu kalsoonaa inuu sii joogayo PSG haddii uusan helin fursadda uu ugu wareegayo kooxda riyadiisa ee Real Madrid.
