Arne Slot, tababaraha Liverpool, ayaa iska diiday fikirka ah in Trent Alexander-Arnold uu ka dhow yahay inuu ka tago kooxda marka la barbardhigo Mohamed Salah iyo Virgil van Dijk, xilli wadahadallada qandaraas kordhinta saddexdan ciyaaryahan ay u muuqdaan kuwo sii socda ilaa 2025.
Alexander-Arnold, Salah, iyo Van Dijk ayaa dhammaantood noqon doona ciyaartoy xor ah dhammaadka xilli ciyaareedkan haddii aan heshiis cusub lala gaarin. Taasi waxay u oggolaaneysaa inay kooxo ka baxsan England kula xaajoodaan heshiisyo horudhac ah laga bilaabo 1-da Janaayo.
Mohamed Salah ayaa bishii hore sheegay inuu ka niyad jabay in aan heshiis cusub loo soo bandhigin, halka Van Dijk uu muujiyay aragti deggan marka mowduucan laga hadlo. Alexander-Arnold, dhanka kale, ayaa si joogto ah loola xiriirinayay Real Madrid, oo qaab la mid ah xagaagii kala soo wareegtay Kylian Mbappé Paris Saint-Germain.
Alexander-Arnold oo toddobaadkan la hadlayay podcast-ka Men in Blazers ee Mareykanka, ayaa ka hadlay rabitaankiisa ah inuu “dhaxal ku reebo kubadda cagta,” inkastoo uusan si cad u sheegin inuu ula jeeday Liverpool oo kaliya ama ciyaarista guud ahaan kubadda cagta.
Slot ayaa qirtay inuusan hubin waxa Alexander-Arnold ula jeeday hadalladiisa, balse wuxuu meesha ka saaray in difaaca midig uu heysto fursad ka badan tan Salah ama Van Dijk ee ah inuu kooxda ka tago.
“Uma hubo si sax ah waxa [Trent] uu yiri,” ayuu Slot ku yiri warfidiyeennada.
“Waxaan maqlay isaga oo ka hadlayey inuu dhaxal ka tago. Ma hubo inuu ula jeeday hal koox oo kaliya ama ciyaaryaha guud ahaan. Sidoo kale ma hubo in ay run tahay inuu yahay kan ugu dhow ee baxaya – halkan kagama hadalno arrimaha qandaraasyada! Waxaan u baahanahay inaan wareysiga dib u daawado.
“Isaga waxaa jira waqtiyo uu aad u fiicanyahay, sida kulamadii City iyo Newcastle. Laakiin wali waxaan arkaa inuu qaab ciyaareedkiisu mararka qaar sareeyo oo uu hoos u dhaco, sida kulankii Fulham.”**
Waxaa muuqata in Liverpool ay wali heysato shaqo adag oo ay ku xalinayso mustaqbalka ciyaartoydeeda muhiimka ah iyadoo la galayo bilaha ugu dambeeya ee qandaraasyadooda.
