Toni Kroos, oo hore ugu soo ciyaaray Bayern Munich iyo xulka qaranka Jarmalka, ayaa sheegay in kooxda Bayern Munich ay si xad-dhaaf ah ugu tiirsan tahay Jamal Musiala marka ay la ciyaarayaan kooxaha waaweyn. Hadalka Kroos ayaa ku soo beegmaya iyadoo Musiala loo aqoonsanayo mid ka mid ah xiddigaha ugu fiican Bayern iyo qaranka Jarmalka.
Musiala, oo weli da’ yar ah, ayaa durba gaadhay heer uu ka noqday xubin muhiim ah kooxda Bayern iyo xulka qaranka Jarmalka, iyadoo ay muuqato in Bayern ay si weyn uga faa’iido hal-abuurkiisa.
Kroos, oo ka hadlayay podcast-ka Einfach mal Luppen, ayaa yiri:
“Waxaan u arkaa inay aad u badan tahay sida ay FC Bayern ugu tiirsan tahay Jamal Musiala. Gaar ahaan marka ay la ciyaarayaan kooxaha adag. Waxaa caadi ah inaad ku tiirsanaato hal ciyaaryahan, laakiin waa la yaab sida ay ugu tiirsan yihiin Jamal xitaa si ay fursado u abuuraan.”
Hadalka Kroos ayaa ku salaysan xaqiiqda ah in Musiala uu yahay mid ka mid ah xiddigaha ugu halista badan kubadda cagta caalamka, isagoo marar badan badbaadiyay kooxdiisa kulamada adag. Sidoo kale, waxay noqon kartaa tani bogaadin muujinaysa tayada uu leeyahay ciyaaryahanka.
