Enzo Maresca oo Saadaaliyay Wakhtiga Ay Chelsea Awood Ku Yeelan Doonto Premier League.
Tababaraha Chelsea, Enzo Maresca, ayaa shaaca ka qaaday in kooxdiisu ay u awood sheegan doonto kooxaha Premier League shanta ilaa tobanka sano ee soo socda, inkastoo uu qiray inaysan xilli ciyaareedkan ku jirin tartanka horyaalka.
Tababaraha Talyaaniga ah ayaa marar badan meesha ka saaray suurtagalnimada ah in Chelsea ay tartan adag la gali karto Arsenal, Manchester City, iyo Liverpool xilli ciyaareedkan, isagoo ku adkaystay in kooxda uu dhisayo ay tahay mid mustaqbalka ku dagaallami karta horyaalka.
“Markii ugu horreysay ee aan la kulmo milkiilayaasha iyo agaasimayaasha ciyaaraha, waxaan u sheegay in sababta da’da iyo tayada kooxda awgeed, Chelsea ay noqon doonto mid ka mid ah kooxaha ugu awoodda badan Yurub shanta ilaa tobanka sano ee soo socda,” ayuu yiri Maresca.
Isagoo sii hadlayay, wuxuu intaas ku daray: “Waxaan u sheegay inaysan ku xirnayn cidda noqon doonta tababaraha. Shanta ama tobanka sano ee soo socda, iyadoo la tixgelinayo da’da iyo tayada kooxda, Chelsea waxay awood ku haysan doontaa kubadda cagta Ingiriiska.”
