Arsenal oo Walaac Weyn Ka Muujisay Dhaawaca Leandro Trossard.
Kooxda Arsenal ayaa wajaheysa walaac cusub kadib markii xiddigooda Leandro Trossard uu dhaawac uga baxay kulankii xulkiisa qaranka Belgium uu la ciyaaray xulka Israel Axaddii. Xaaladda xiddiga garabka ka ciyaara ayaa noqotay mowduuc laga hadal hayo baraha kaddib markii uu ka baxay ciyaarta daqiiqaddii 37-aad, kaddib markii uu si xun ugu dhacay garoonka.
Trossard, oo ah mid ka mid ah ciyaartoyda muhiimka u ah Gunners, ayaa kulanka ku soo bilowday isagoo qayb muhiim ah ka ahaa qorshaha xulka Belgium. Si kastaba ha ahaatee, dhaawaca soo gaaray ayaa qasab ka dhigay in uu garoonka isaga baxo, taasoo walaac ku abuurtay kooxda Arsenal oo hor la daalaa-dhaceysay dhaawacyo dhowr ah oo saameynaya ciyaartoyda muhiimka ah.
Xiddiga ayaa ilaa iyo hadda u saftay Arsenal 15 kulan xilli ciyaareedkan, isagoo dhaliyay 2 gool. Waxqabadkiisa ayaa ahaa mid ay taageerayaasha Gunners ku riyaaqeen, gaar ahaan marka la eego doorkiisa kala duwan ee weerarka kooxda.
Dhaawaca soo gaaray Trossard ayaa ka sii daraya dhibaatada dhaawacyada ee Arsenal, iyadoo ciyaaryahanno muhiim ah sida Gabriel Jesus iyo Thomas Partey ay horeba u maqnaayeen.
Tababaraha Arsenal, Mikel Arteta, ayaa laga yaabaa inuu dib u eego qorshihiisa maadaama uu rajeynayo in kooxdiisu sii wado qaab ciyaareedkeeda wanaagsan ee xilli ciyaareedkan.
Sida ay wararku sheegayaan, kooxda caafimaadka ee Belgium ayaa xaqiijisay in ay si dhow ula socon doonaan xaaladda Trossard, iyadoo la filayo in baadhitaanno dheeri ah lagu sameeyo si loo ogaado mudada uu garoomada ka maqnaan doono Trossard.
Waa xaalad kacsan oo kooxda Arsenal ay wajahayso iyadoo kulammo muhiim ah ay ku soo fool leeyihiin dhammaadka sanadkan. Waxaa lagu qasbanaan doonaa inay xalliyaan dhibaatada dhaawacyada si ay u sii ilaashadaan booska sare ee Premier League.
