Daaficii hore ee kooxda Chelsea William Gallas ayaa shaaciyay in Cole Palmer laga yaabo inuu isku dayo inuu ka tago Stamford Bridge xagaaga soo socda haddii kooxda uu hoggaamiyo tababare Maresca ay ku guuleysan weyso wax koob ah.
Sida laga soo xigtay Gallas, Palmer waxa uu leeyahay dadaal iyo karti uu uga soo bixi karo koox sare oo Yurub ka dhisan.
Haddii uu u dhaqaaqo Barcelona waxay noqon kartaa dookh soo jiidasho leh oo soo jiidanaysa xiddiga da’da yar ee Ingiriiska.
Gallas waxa uu aaminsan yahay in Barcelona ay Palmer siin karto fursad uu ugu tartamo heerka ugu sarreeya ee horyaalka isla markaana ay suurtogal tahay inay xaqiijiso ku guuleysiga koobab waaweyn. Waxa uu tilmaamay in Barcelona ay horeba u heysatay xirfadle-yaal da’yar oo ay ku jiraan xiddigaha soo kacaya sida Lamine Yamal, waxaana hadda lagu xamanayaa inay hesho Nico Williams, taasoo adkeyn karta iney u dhaqaaqdo saxeexa Palmer.
Iyadoo ay jiraan arrimahan, Gallas waxa uu carabka ku adkeeyay in qaabka Barcelona ay u ciyaarto iyo taariikhdeeda hodanka ah ay u horseedi karto Palmer jawi horumar oo ka duwan kan Chelsea. Arrintan ayaa Palmer ka caawin karta inuu kubadda cagta ku reebo dhaxal wax ku ool ah.
Isaga oo dib u eegis ku sameeynaya xaalada Palmer ee Chelsea, Gallas waxa uu si maldahan u sheegay inay niyad jab ku noqon karto 22 jirkaan inuu sii joogo Chelsea maadaama aysan aheyn koox ku tartameysa horyaalka. Inkasta oo Chelsea ay muujineyso calaamado horumar ah oo ka fiican sidii hore, Gallas ayaa ka digay in haddii kooxdu ay ku guuldareysato inay qaado wax koob ah dhamaadka xilli ciyaareedka,waxaa laga yaabaa in Palmer uu dareemo baahida loo qabo inuu dib u qiimeeyo mustaqbalkiisa.
Gallas waxa uu xusay in da’yarkan uu mar hore isu muujiyay inuu yahay mid ka mid ah ciyaartoyda ugu rajada wanaagsan Premier League tan iyo markii uu 40 milyan oo ginni uga soo wareegay Manchester City.
waxa uu ka qayb qaatay 28 gool iyo 16 caawin 41 kulan oo uu saftay.
Inkastoo Palmer kula jiro Chelsea heshiis waqti dheer ah oo uu ku sii joogayo ilaa 2033, Gallas waxa uu qiray in haddii Chelsea ay la jaanqaadi weyso hammiga Palmer, uu isaga hayaami doono kooxda.
