Chelsea ayaa heshiis amaah ah kula wareegtay garabka Manchester United Jadon Sancho ilaa dhamaadka xilli ciyaareedkan.
Heshiiska ayaa waxaa ku jira in Chelsea ay waajib ku tahay inay kula soo saxiixato xiddiga heerka caalami ee dalka England, oo 24 jir ah, inta u dhaxaysa 20-25 milyan oo ginni xagaaga soo aadan.
Sancho ayaa United ugu soo biiray heshiis 73 milyan oo ginni ah oo uu kaga soo biiray kooxda reer Germany ee Borussia Dortmund bishii July 2021 laakiin waxa uu waqti adag ku qaatay Old Trafford.
Waxa uu u saftay 83 kulan seddexdii xilli ciyaareed, laakiin waxa uu khilaaf heersare ah kala kulmay tababare Erik ten Hag.
Isagoo dib ugu biiray Dortmund amaah bishii Janaayo, waxa uu ku soo laabtay United xagaagii mana uusan ku jirin kooxda labada kulan ee Premier League ilaa hadda.
23 kulan ayuu uu u saftay England, isagoo la ilduufay Euro 2024 iyo Koobka Adduunka ee Qatar 2022kii.
