Real Madrid waxa ay Isniintii si rasmi ah u shaacisay inay la saxeexatay xiddiga reer France ee Kylian Mbappe oo ay si xor ah ugala soo wawreegeen PSG, waxaana hadda la sugayaa waqtiga ay kooxdiisu sida rasmiga ah usoo bandhigayso ee Santiago Bernabeu lagu soo dhoweynayo iyo xilliga uu safanayo ciyaartiisa koowaad.
Los Blancos ayaa soo gabogabaysay raadintii Kylian Mbappe ee muddada dheer soo qaadatay, waxaanay ka saxeexday heshiis shan sannadood ah oo socon doona illaa laga gaadhayo sannadka 2029.
Kylian Mbappe ayaa xidhan doona No.9 xilli-ciyaareedkiisa koowaad maadaama lambarka uu jecel yahay ee No.10 uu haysto Luka Modric oo xilli-ciyaareedka dambe sii joogi doona Santiago Bernabeu, laakiin sannad kaddib ku wareejin doona Mbappe lambarkan, taas oo ka dhignaan doonta in xiddiga reer France uu xulkiisa Faransiiska iyo kooxdiisa Real Madrid-ba uu u xidhan doono No.10.
Su’aasha aadka la isku weydiinayo ee ah waqtiga uu Mbappe u ciyaari doono kulankiisa koowaad ayaa waxa ka jawaabay warbaahinta Spain, waxaana uu laacibkani xidhan doonaa garanka kooxdiisa oo uu garoonka soo geli doonaa ciyaarta AC Milan ee Jyuly 31 ee ka dhici doonta garoonka Soldier Field ee waddanka Maraykanka, halkaas ayaanu ka bilaabmi doonaa waayihiisa cusub ee Real Madrid.
