Jude Bellingham ayaa xirtay maaliyad gaar ah ka dib markii ay Real Madrid xaqiijiyeen inay u soo baxeen finalka Champions League.
Bellingham ayaa qeyb ka ahaa kooxdii Real Madrid ee wadar ahaan labadii lug ee semi-finalka ku garaacday Bayern Munich 4-3.
Xiddiga lambarka 5aad ee Real Madrid ayaa xirtay maaliyad gaar ah intii uu bixinayay wareysiyada ciyaarta ka dib, waxaana ku qorneyd ‘A por la 15’ – oo micnaheedu yahay “aan u dhaqaaqno 15”
Los Blancos ayaa ku guuleysatay 14 koob oo Champions League ah, waxayna ku guuleysan doonaan midkoodii 15aad haddii ay garaacaan Borussia Dortmund ciyaarta finalka ee ka dhici doonta garoonka Wembley ee magaalada London.
Ciyaarta ka dib Bellingham ayaa yiri: “Ciyaarta ka hor waxaan eegay dhinacyadeyda, waxaana ku fekeray inaysan jirin meel ka fiican oo aan joogi lahaa. Halkee kale ayaan joogi lahaa?
“Todoba jir ayaan ahaa oo ku noola magaalada Birmingham markii aan ku riyoonayay habeen sidaan oo kale ah. Inaan halkaan soo gaaro waa wax kale, micno ayay ii sameyneysaa aniga. Aad ayaan ugu faraxsanahay inaan halkaan joogo.
“Waxaan dareemayaa inay qoyskeyga yihiin, ciyaartoydaan waa sida qoyskeyga oo kale. Waxaan dareemayaa inay horay ii riixayaan.”
