Kooxda kubadda cagta Chelsea ayaa heshiis cusub oo lacag badan uu ku helayo ku abaal-marinaysa xiddiga reer England ee Cole Palmer oo xagaagii ay kala soo wareegeen Manchester City isla markaana qandaraas waqti dheer ah ay ka saxeexeen.
21 jirkan oo ah ciyaartoyga ugu wanaagsan Chelsea xilli-ciyaareedkan isla markaana dhaliyey 20 gool oo horyaalka Premier League oo kabta dahabka ah kula tartamaya Erling Haaland ayaa waxa ay Chelsea ka baqaysaa in laga afduubto iyadoo loo balan-qaadayo lacago badan.
Palmer oo ciyaartii Everton ee horyaalka Premier League dhaliyey afar gool, isla markaana wadartiisa guud ee dhamaan tartamadu ay tahay 25 gool, ayaa waxa uu isku qoray liiska ciyaartoyda sida weyn loo saadaalinayo inay ka mid noqon doonaan xulka qaranak England ee Euro 2024.
Inkasta oo uu bandhig heersare ah ka samaynayo garoomada, haddana waxa layaab ah in uu Palmer saddex-jeer ka mushahar hooseeyo qaar ka mid ah ciyaartoyda kooxdiisa, sida Raheem Sterling oo ah ciyaartoyga ugu mushaharka badan kooxda oo dhan.
Sida uu qoray wargeyska Daily Star, Palmer oo qaata mushahar dhan £80,000 Gini toddobaadkii, ayay Chelsea laba-jibbaar ka dhigi doontaa mushaharkiisa, si loogu dhoweeyo Raheem Sterling oo usbuucii u xaadira lacag dhan £325,000 Gini.
