Kooxda kubadda cagta Chelsea ayaa xaqiijisay in uu dib u dhaawacmay xiddigii ay lacagta badan kasoo bixisay xagaagii tegay, kaas oo isaga oo dhaawacan soo gaadhay Stamford Bridge haddana mar kale dib u dhaawacmay oo garoomada ka maqnaan doona inta ka hadhay xilli-ciyaareedka.
Khadka dhexe ee Belgium ee Romeo Lavia oo £58 milyan oo Gini ay Chelsea kaga soo iibsatay Southampton ayaa waxa soo gaadhay dhaawac cusub oo ka saaraya xisaabta kooxdiisa ee xilli-ciyaareedkan socda.
20 jirkan uu dhaawacu ragaadiyey, ayaa hal kulan oo kaliya u saftay Chelsea, waxaanay ahayd bishii December oo uu beddel kusoo galay ciyaar ay kooxdiisu la dheeshay Crystal Palace, taas oo uu 32 daqiiqadood oo kaliya garoonka ku jiray.
War-saxaafadeed ay Chelsea soo saartay ayaa waxa ay ku dheegtay, in Romeo Lavia uu dib u dhaawacmay isaga oo kasoo kabanaya dhaawac kasoo gaadhay ciyaartii Crystal Palace ee bishii December, isla markaana aanu taam noqon doonin inta ka hadhay xilli-ciyaareedka.
Tababare Mauricio Pochettino oo la rumaysan yahay inuu kalsooni badan ku qabo Lavia ookasoo baxay kulliyadda da’yarta Man City ayaa waxa uu ku qasbanaan doonaa inuu sugo illaa xilli-ciyaareedka dambe.
Si kastaba ha ahaatee, Romeo Lavia ayaa xilli-ciyaareedkii hore waxa uu kooxdiisii hore ee Southampton u saftay 35 ciyaarood oo uu bandhig heersare ah ka sameeyey garoomada, taas oo keentay in saxeexiisa ay isku qabsadaan Chelsea iyo Liverpool, iyadoo uu laacibkani doortay Blues.
