Tababaraha xulka qaranka England ee Gareth Southgate ayaa liiska ciyaartoydiisa ka saaray saddex laacib oo difaaca ah ka hor kulanka Belgium ee Salaasada ee ka dhici doona garoonka Wembley Stadium.
Gareth Southgate ayaa hore u xaqiijiyey dhaawaca difaaca Manchester City ee Kyle Walker oo ay waxyeello kasoo gaadhay kulankii Brazil ee Axaddii oo uu qaybta hore xanuun ka dareemay muruqa isaga oo badbaadiyana kubbad uu Vinicius Junior weydaariyey goolhaye Jordan Pickford, taas oo markii uu goolka oo cidlo ah kasoo qabtay uu dhulka fadhiistay.
Manchester City ayaa waxa haddana lagu wargeliyey in uu dhaawacmay difaaca dhexe ee sidoo kale khadka dhexe uga ciyaara ee John Stones oo isagana laga saaray liiska xulka England ee kulanka Belgium, waxaana isaga iyo Walker ay dib ugu noqonayaan kooxdooda Man City oo ku samayn doonta baadhitaanno dheeraad ah.
Dhaawacyada xulka England intan uun kuma eka, waxaase sidoo kale dhaawacmay difaaca Manchester United ee Harry Maguire oo isagana ciyaartii Brazil lagu beddelay Ben Chilwell, waxaanay saddexdooduba hadda dib ugu noqonayaan magaalada Manchester.
Walaaca ugu weyn waxa uu haystaa Manchester City oo Axadda soo socota la ciyaari doonta Arsenal, waxaana la sugayaa natiijada baadhitaannada lagu samaynayo John Stones iyo Kyle Walker oo haddii ay ciyaartaas ka maqnaadaan ay awoodda kooxdoodu wiiqmi doonto.
