Xiddiga reer France ee Kylian Mbappe ayaa ka jawaabay wararka sheegaya inuu mar horeba heshiis la gaadhay kooxda reer Spain ee Real Madrid oo uu u wareegayo dhamaadka xilli-ciyaareedkan, waxaana uu meesha ka saaray wararkaas.
Kylian Mbappe oo qandaraaskiisa PSG uu ku egyahay dhamaadka xilli-ciyaareedkan ayaa la sheegay inuu naadigiisa ku wargeliyey inuu tegayo marka uu xilli-ciyaareedku dhamaado.
Laacibkan oo ay kooxo badan oo reer Yurub ah raadinayaan, sidoo kalena laga doonayo horyaalka waddanka Sucuudiga ayaa waxa la hadlay saxaafadda isaga oo qayb ka ah xulka qaranka Faransiiska ee kulamada caalamiga ah ee toddobaadkan.
Mbappe ayaa waxa uu sheegay in aanu wali wax cusub oo mustaqbalkiisa ah haynin, waxaana uu ka warwareegay in uu si cad u beeniyo inuu heshiis la gaadhay Real Madrid, isaga oo yidhi: “Wali ma aanan shaacinin wax mustaqbalkayga ku saabsan, mana hayo wax aan shaaciyo illaa heerkan, sababtoo ah wax cusub ma jiraan.
“Anigu mar walba waxa aan idiin sheegaa, in aan anigu idinla wadaagi doona wixii cusub oo aan shaacin doono, hortiina ayaan iman doonaa oo sida ragga ayaan idiinla hadli doonaa.”
