Antoine Griezmann ayaa waxaa afkiisa ka soo baxay hadalo aflagaado ah intii ay socotay rigooradii ay ku kala baxeyeen kooxaha Atletico Madrid iyo Inter Milan ciyaartii Champions League ee garoonka Metropolitano.
Xiddiga Faransiiska ayaa si ereyo aflagaado ah uga jawaab celiyay markii laacibka Inter Milan Alexis Sanchez uu qasaariyay rigooradiisa.
Weeraryahanka reer Chile ayaa ahaa ciyaaryahankii ugu horeeyay ee Inter ka qasaariya rigoorada, iyadoo ay aheyd rigooradii labaad ee kooxda. Waqtigaas Griezmann ayaa ka soo daawanayay kursiga keydka, wuxuuna u jeestay dhanka Rodrigo De Paul oo dhoolacadeynaya isagoo ku yiri: “Waa qashin, midka reer Chile waa qashin.”
Kaamirada Movistar Plus ayaa qabatay Griezmann markii uu aflagaadeynayay Alexis Sanchez, waxayna noqotay arin si weyn looga hadal hayo Spain iyo baraha bulshada.
Rigooradii uu qasaariyay Alexis Sanchez waxay bilow u aheyd musiibadii ku habsatay kooxda Talyaaniga, iyagoo ka haray tartanka Champions League oo ay final ka gaareen xilli ciyaareedkii la soo dhaafay.
Atletico Madrid ayaa haatan ah kooxda seddexaad ee reer Spain ee u soo baxday wareega sideed dhamaadka Champions League ka dib Real Madrid iyo Barcelona.
Waxay Jimcaha ogaan doonaa kooxda ay la ciyaarayaan wareega sideed dhamaadka iyadoo isku aadka Champions League uu Jimcaha ka dhici doono magaalada Nyon ee dalka Switzerland.
